Rico AU: Kana Basoghak Banyak Kepeang, Tapi Saku Bajaik dan Indak Paduli

Rico Adi Utama: Jurnalis dan Organisatoris

Dek makin dakeknyo rencana mamiliah Bupati dan Wakil Bupati Padang Pariaman, tahun 2020 dimuko, lah banyak nan mangaku tokoh dan tampil di beberapa media sosial maupun dari muluik ka muluik. Tak lain, sabagian tujuan tampil tasabuik, adolah setor wajah dek ado niek ka maju pulo.

Lagak kepeang jo gaya, lah mulai bapasan dan disampaikan. Kato tim hore - horenyo, apak nan ka inyo usung bakepeang dan urang bapangaruah. Tapi, salamo ko hanyo sakadar garegak dan ndak ado ciek alahnyo.

Lain pulo apak nan sadang duduak kini ko, kapado wartawan baliau mangaku lah punyo daftar antrian belasan banyaknyo. Sampai - sampai paniang pulo apak tu mamiliah tambatan hati, pendamping kelak baliau baliak bakuaso.

Dan disuduik nan sunyi, ado apak nan mugha senyum, lambek - lambek dan diam - diam salalu babuek. Parahnyo, lah cabiak - cabiak isi saku apak tu, nan ka urang bapasoan juo inyo babuek baiak.

Apak tu, dari mulai baoto mewah, kini hanyo bakureta motor hilia mudiak. Dari bakantuo surang, kini lah manumpang jo urg lain alias mangontrak.

Tapi, apak tu ndak panah diam. Saku e lapang dan ndak panah rusuah jo rajaki. Lain jo apak - apak nan mangaku banyak kepeang tu, lagak lei bantuak sipuluik, tapi kok ditanak badarai. Lagak banyak kepeang, tapi kalau untuak sosial apo bilo ndak ado gaungnyo, baliau acok bapikie panjang.

Ughang Piaman Laweh (Kota Pariaman dan Kabupaten Padang Pariaman sekitarnya), terkenal babudi santun dan tepa salero alias pamugha. Tapi, kalau ado ughang Piaman Laweh nan sampilik saku bajaik & mandameh je mancaliak ughang kasusahan, paralu di chek keaslian Piaman Laweh e.

Semoga apak - apak nan ka mamimpin Padang Pariaman kedepan, salain ughang pamugha, kok dapek handak e nan ba iman jo ba taqwa. Sabok, nagari kito ko indak ka barokah dan indak ka labiah elok, kok ndak di saratoan jo pondasi agamo. Baitu handaknyo...

Label: ,